Dem Bundesstoot Rio Grande do Sul seine Missione-Reschion, dort im Nordwest (Neikolonie Gebiet), tut sich methodisch voarbereite um mit dem kommende unn hochonsteckende Coronavirus umzugehn.

Der richtiche Noome für der Coronavirus iss jo CONVID-19, das iss so weil es annre unn wissenschaftlich gut bekannte Coronaviruse schon gebt.

Was do mit dem CONVID-19 so oorrich schlimm iss, iss dass es so nei unn unbekannt iss. Es tut sich üwerleicht von en Mensch zu dem anner verbreite. En infizierte Person ohne kloore Krankhet-Symtome kann schon viele annre Leit onstecke.

Wenn rund um achtzich Prozent (80%) von infizierte Mensche davon net sterwe, viele tun leider davon umkomme – speziool ältre Leit unn Persone, ei wo schon von annre Gesundhetsprobleme leide – i.e. Zuckerkrankhet (Diabetes), Herzkrankhet, unn so weiter …

Wear denkt, dass ear orrer sie infiziert iss unn Grippe-ähnliche Symptome an sich merke tut, der/die soll Heem bleiwe, sich sellebst von annre Leit isoliere (en zwooi-wochelange Quarantäne mache). Dem Dokter orrer Krankehaus tut ma’ tel.-onrufe awer net derekt gleich dort hin gehn, weil dass weard dann annre Patiente mit dem der Coronavirus onstecke – etwas wo, naja sellebstverständlich, net gut iss!!

Nochwas, es tut mear werklich leit awer ich muss unbedingt üwer etwas unbequemes noch erwähne: wear do krank wear krieht der Schisser (Diarrhöe), dodrum in viele Grossstädt gebt keh Toalete-Papier für se koffe …

Das hesst ooch, ei ma’ soll jo voarhear Ploone mache, sodass wenn ma‘ krank weard, dass ma’ sich richtich hydratisiere kann.

Net vergesse: ma’ soll seine Hände öfterschs wasche, net seine Aue, Noos unn Mund mit seine Hände reibe orrer kratze; net annre Persone kisse orrer die Hand schüttle; unn en komplet Halt mit der Matetee-Runde. Niemand möcht en Panik-Macher sinn, doch ma’ soll jo schon sich üwich die Situation richtich unn gut informiere, gell?!

Pass eich gut aus unn bleib gesund!