DAS CORONAVIRUS (wissenschaftlich: CONVID-19), mannichmo ooch beim weitrem Publikum im Maskulinum gesetzt, der Coronavirus, iss en neie Oort von Virus, wo bei Mensche en oorrich schlimme Lunge-Entzündung beibringt, ei en seahr Infektiöse Krankheit, wo grood earstmoh voar Monate in China voarkomm iss. Corona hesst Kron uff Deitsch, unn das iss so weit der Virus mikroskopisch so wie en Kron aussieht. Leider befindt sich der Coronavirus jetz schon in nächst alle Kontinente, nuar net dort unne in der isoliert unn unnerbevölkerte Antarktika.

Mensche wo schon weche etwas annres krank sind, ooch schwächre Persone unn ältre Leit, die all soll ma’ speziool von en Coronavirus-Onsteckung beschütze – die tödlichkeit, ma’ soll noch erwähne, iss ungewöhnlich hoch. So das ma’ en besser Ohnung kann honn, jäahrlich sterwe wennicher wie en halleb Prozent Mensche von der gewöhnliche Grippe, awer mit dem Corona iss es um zwooi-unn-halleb Prozent.

Wenn so neie Variante von bekannte Vire voar komme, wie ‘s der Fall iss mit dem CONVID-19, do gebts enfach keh Spritzchjie um Mensche davon se beschütze. Wissenschaftler/Inne brauche wennischstens en Joahrlang, um en effektive Impfstoff ze entwickle. Newich wichtiche Isolierung von Patiente, was kann dann gemacht sin um kranke Mensche se helfe? Naja, sicherlich gebts etliche Sache, wo do könne gemacht sin: es gebt, zum Beispiel, antibiotische Tratamente für sekundäre, also um die sogenännte opportunistische Erkränkunge zu kontroliere; weiterhin könne Patiente ooch noch mit Atemgeräte (i.e. Respirations-Apparate) gehollef sin; dann ooch noch Blutserum für Noohrung, unn soweiter.

Epidemie x Pandemie – Was iss dann der Unnerschied zwischich die zwooi Wörter, wo ma’ in solche ernstliche Krise-Situatione immer wieder höre tut?
Naja, ei en Epidemie iss jo en Erkränkung, wo dren in ene definierte scheographische Reschion unner der Population weit verbreidt geb iss. Wenn es eventualment passiert, dass so en Krankheht sich uffemol rasch, unkontroliert, weltweitwech verbreite tut, das nennt ma’ dann en Pandemie. Also, en schlechte Troom für Politiker in demokratische Gesellschafte.