Wie die FENASOJA helwe könnt, die regionool deitsche Sproch im RS voran bringe

Organisatione wie die Secretaria de Estado da Cultura do RS (SedacRS) unn das IPHAN (Instituto do Patrimônio Histórico e Artístico Nacional ) oorweite bereits droon, die deitsch Sproch unn Kultuar im Bundesstoot se schütze unn se promoviere. Die FENASOJA könnt jo sicherlich en starrek Parceiro in der Bemühunge sin.

En historischer Zusammehang

Die Reschion um Santa Rosa hot en spezioole Verbinnung zu der deitsche Sproch. Die erste Sojasome, wo hier geplanzt geb sinn, die worre jo von US-amerikoonische Missionare mit deitsche Voarfoohre unn sproch-kulturoolische Woorzle hiehear gebrung. Zu der Zeit domols woor das Riograndenser Hunsrückisch die Hauptsprooch in vieler Gemeinschafte in der Gechend. Die Sproch woor net nuar en Kommunikationsmittel, also ooch en Wech, etliche Wisse unn Kentnisse üwer Landweertschaft unn Gemeinschaftsoorweit weitersegen.

Doch trotz der starrek Verbinnung weerd die deitsch Sproch heitztooch uff der FENASOJA üwerhaupt net sichtbar. Dabei könnt das grousse Event en wichtiche Plattform sin, um die Sproch unn Kultuar wieder ins Bewusstsin se rufe unn sie feire.

Die FENASOJA, en grosse Event in Santa Rosa, iss net nuar wichtich für die Landweertschaft, awer ooch für die Kultuar unn Geschicht von der Reschion im Nordwest von Rio Grande do Sul. Die Reschion hot starke Woorzlle in der deitsche Inwanderung, unn die Sproch, wo viele von der erste Siedler gesproch honn – das Riograndenser Hunsrückisch – iss en bedeitender Tehl von die Geschicht. Leider weard die Verbinnung zwischich der Event unn der deitsche Sproch oft üwersiehn, obwohl sie en wichtiche Rolle im kulturoolle Erbe von der Reschion spielt.

Idee zu der Feerdrung von der Sproch

Die FENASOJA könnt viele Möchlichkeite schaffe, um die deitsch Sproch unn Kultuar se unnersteetze:

1. Zwooisprochiche Programme

Materiale wie Flyer, Schiller orrer Oonkündigunge könnte ooch uff Riograndenser Hunsrückisch üwersetzt werre. Das weard die Verbinnung zu der Geschicht von der Reschion deitlich mache.

2. Kultuar-Stände unn Workshops

Do könnte Bereiche ingerichdt werre, wo sich mit der deitsche Inwannrung unn Sproch beschäftiche tärre. Dazu könnte klene Workshops üwer die Sproch orrer die Geschicht von der Reschion ongebot werre.

3. Zusammeroorweit mit SedacRS unn IPHAN

Gemensam mit der Organisatione könnte die FENASOJA Projekte oonfänge, um die deitsche Sproch alswie kulturool-Erbe sichtboorer mache.

4. Musik und Geschichten

Musik unn Theooter in Riograndenser Hunsrückisch könnte die Besucher begeistre unn zeiche, dass die Sproch lebendich iss. Ooch das Geschichte verzähle in der deitsche Sproch könnt jo en Highlight sin.

5. En spezioole Tooch für die Sproch

Das Event könnt en spezioole Tooch orrer en Apresentation / Veranstalung von der deitsche Sproch unn Kultuar widme. Das wäer en schöne Erkennung sin üwich der historische Bedeitung von der Sprache für so viele Mensche in Südbräsilje.

Waroom das wichtich iss

Wenn die FENASOJA unser reschionoole Varietät von Deitsch noh vorne bringt, zeicht se net nuar Respekt für die Geschicht von der Reschion, es träht also ooch do dabei, die Sproch für die kommende Generações se bewoohre. Sie könnt ooch mehr Besucher oonziehe, die Intresse on der enziche Kultuar unn Geschicht von der Reschion honn.

Das sinn dann nuar en Poor Ideee, üwich dene die FENASOJA sich bedenke könnt, die Bemühunge von SedacRS unn IPHAN zu untersteetze, unser beliebte alte Sproch alswie immaterioolles Kultuar-Erbe se schütze.

En Appell on die Zukunneft

Die FENASOJA iss schon heit en Symbol für Fortschritt unn Zusammer-Oorweht. Mit en stärkre Verbinnung zu der deitsche Sproch könnt sie ooch en Symbol für der Respekt voar der Vergangheit unn die Bewoohrung von der kultuar Diversität werre. Das wäerd net nuar en Hommenoosch on die erste Siedler sin, awer ooch en Schritt in en Zukunneft, wo die kulturool Vielfalt von Rio Grande do Sul echt völlich gefeiert gebt weard.