Wie gewusst, ei natearlich sin jo schon immer menschliche Sproche in der Welt ausgestorb, wenn ma retua gucke tut in der Hunanität ehre lange Geschicht uff der Eard. Awer in der letzte hunnert (100) Johre iss die Verschwennung von ‘klenre Sproche’* doch seahr dramatisch uffgestieh … Leider das verstehn die measchte Mensche heitztooch net – einschlisslich die Persone, ei die Mensche, wo sellebst Sprecher unn Sprechrinne von die bedrohte Sproche sin. Ich sellebst honn in mein Lewe viele Mensche gekennt, Mensche wo unser Riograndenser Hunsrückisch als Moddersproch harre – neh!, richticher soll ich dohie ‘honn’ schreiwe, weil das sin jo Persone wo immer noch heit am lewe sin … Naja, wenn ma se direkt froche tut:
-Wie hesst dein Sproch?
die Antwort weerd dann sin:
-ich wess net … awer wie mea spreche is verkeart …
unn dann geht ‘s weiter mit Abweartunge, mit Pejorative.
So en tiefe sellebstbewusstlosichkeit unn Abtrennung von enem seine eichne Identität, wenn ma sich echt do driwwer üwweleht, das iss jo schon etwas, meine Güte nochmole, was für en gross unn trauriche Schand!!!

*’klenre Sproche’ sin die sogenännde “Minderheitensprachen”, ei so nennt ma se uff Hochdeitsch; unn in unser Nationool-Sproch, uff Bräsiljoonisch, do hesse die, “as línguas minoritárias”.

http://www.rodrigotrespach.com/2015/07/28/o-mundo-ate-ontem/

-Paul Beppler / Admin. von der Riograndenser Hunsrückisch Dialekt-Gemeinde im Facebook